गोव्यात रुजतोय वारकरी संप्रदाय...! पर्वरी ते म्हापसा पहिली 'आषाढी एकादशी वारकरी दिंडी' उत्साहात

  

पणजी : सी एल वृत्तसेवा 

  विठू नामाच्या गजरात तल्लीन होत पाश्चिमात्य संस्कृतीचा पगडा असलेल्या गोवा राज्यात वारकरी संप्रदाय रुजतो आहे. हे अलीकडच्या पाच-दहा वर्षात प्रकर्षाने दिसून येत आहे. चंगळवादाकडे झुकलेल्या समाजाला पुन्हा योग्य दिशा देण्याचे कार्य संतांची शिकवणच देऊ शकते हे कळून चुकल्याने असे अनेक उपक्रम राबवले जात आहेत.

   अभिजात सांस्कृतिक केंद्र, पर्वरी आणि श्री हनुमान देवस्थान, हौसिंग बोर्ड, पर्वरी यांच्या संयुक्त विद्यमाने यंदा प्रथमच पर्वरी ते म्हापसा आषाढी एकादशी वारकरी संप्रदायाच्या पवित्र परंपरेचा शुभारंभ करण्यात आला. डॉ. अरुण मराठे आणि श्रीहरी आठल्ये यांच्या पुढाकाराने सुरू झालेल्या या नवीन वारी परंपरेला पर्वरी परिसरातील पांडुरंग भक्तांनी उदंड प्रतिसाद दिला. "विठ्ठल विठ्ठल जय हरी विठ्ठल" या नामघोषात आणि अत्यंत भक्तीमय वातावरणात ही वारकरी दिंडी यशस्वीरीत्या पार पडली. या ऐतिहासिक पहिल्या वारीमध्ये पर्वरीसह गोव्याच्या विविध भागांतून आलेल्या शेकडो भाविकांनी मोठ्या उत्साहाने सहभाग घेतला.

   हिंदू संस्कृतीत आणि वारकरी संप्रदायात आषाढी एकादशीला अत्यंत पवित्र आणि अनन्यसाधारण महत्त्व आहे. आषाढ महिन्यातील शुक्ल पक्षातील एकादशीला 'देवशयनी एकादशी' किंवा 'आषाढी एकादशी' म्हणून ओळखले जाते. या दिवशी भगवान विष्णू म्हणजेच श्री विठ्ठलाची मनोभावे पूजा केली जाते. आषाढी वारीच्या निमित्ताने वारकरी गोतमी, ज्ञानेश्वरी व तुकाराम गाथेचा अभंग गात, टाळ-मृदंगाच्या गजरात पंढरपूर किंवा स्थानिक मंदिरांपर्यंत चालत जाऊन आत्मिक शुद्धीचा अनुभव घेतात. ही परंपरा केवळ चालण्याची नसून, अहंकार बाजूला सारून ईश्वराशी एकरूप होण्याची आणि समतेचा संदेश देणारी मानवी संस्कृतीची मोठी पर्वणी आहे.

अभिजात सांस्कृतिक केंद्र आणि श्री हनुमान देवस्थानच्या वतीने सुरू केलेली ही वारकरी वारी सेवा अशीच अखंड सुरू राहावी, आणि साक्षात विठुमाउलीची कृपा पर्वरीवासीयांवर सदैव राहो, अशी प्रार्थना यानिमित्ताने पांडुरंग चरणी करण्यात आली.