बागिलगे गावच्या सुपुत्र तुषार पाटीलने आयटीबीपीमध्ये गाजवले नाव; १२४४ प्रशिक्षणार्थींमधून प्रथम क्रमांक, साध्या कुटुंबातून देशसेवेपर्यंतचा प्रेरणादायी प्रवास, तरुणांसाठी आदर्श

तामिळनाडूतील शिवगंगाई RTC मध्ये ‘ओव्हर ऑल बेस्ट ट्रेनी’ पुरस्काराने तुषार पाटील सन्मानित

संपत पाटी, चंदगड / सी. एल. वृत्तसेवा

        देशसेवेची तीव्र जिद्द, कठोर परिश्रम आणि अनुशासनाच्या जोरावर बागिलगे गावच्या सुपुत्र कु. तुषार तानाजी पाटील यांनी इंडो–तिब्बत बॉर्डर पोलिस फोर्स (ITBP) मध्ये उल्लेखनीय कामगिरी करत संपूर्ण तालुका, जिल्हा व राज्याचा गौरव वाढवला आहे. तामिळनाडू येथील आर. टी. सी. शिवगंगाई या आयटीबीपीच्या सर्वोत्कृष्ट प्रशिक्षण केंद्रात पार पडलेल्या दीर्घकालीन प्रशिक्षणात १२४४ प्रशिक्षणार्थींमधून प्रथम क्रमांक पटकावत त्यांनी ‘ओव्हर ऑल बेस्ट ट्रेनी’ हा मानाचा पुरस्कार मिळवला आहे.

      या उल्लेखनीय यशाबद्दल तुषार पाटील यांना आयटीबीपीचे महानिदेशक (DG) श्री मनु महाराज यांच्या शुभहस्ते, मान्यवरांच्या उपस्थितीत सन्मानित करण्यात आले. प्रशिक्षण काळात शारीरिक क्षमता, शस्त्रप्रशिक्षण, परेड, शिस्त, नेतृत्वगुण तसेच एकूणच कार्यक्षमता या सर्व निकषांवर तुषार यांनी सर्वोत्तम कामगिरी करत आपली गुणवत्ता सिद्ध केली.

        कु. तुषार तानाजी पाटील हे श्री तानाजी ईश्वर पाटील यांचे चिरंजीव असून, अत्यंत साध्या कुटुंबातून येत त्यांनी देशाच्या सीमांचे रक्षण करण्याचे स्वप्न उराशी बाळगले. प्रतिकूल परिस्थितीतही त्यांनी हार न मानता सातत्याने मेहनत, संयम आणि आत्मविश्वासाच्या बळावर हे सर्वोच्च यश मिळवले. त्यांचा हा संघर्षमय आणि यशस्वी प्रवास आजच्या तरुण पिढीसाठी प्रेरणादायी ठरत आहे.

        तुषार पाटील यांच्या या यशामुळे बागिलगे गावात आनंदाचे वातावरण असून, ग्रामस्थ, मित्रपरिवार, नातेवाईक तसेच विविध सामाजिक व शैक्षणिक संस्थांकडून त्यांच्यावर अभिनंदनाचा वर्षाव होत आहे. देशसेवेसाठी झटणाऱ्या तरुणांसाठी तुषार पाटील यांचे यश “मेहनतीला पर्याय नाही” हा प्रेरणादायी संदेश देणारे ठरले आहे.