पत्रकार संरक्षण कायद्याची लवकरच अंमलबजावणी..! मुख्यमंत्री फडणवीस यांचे नोटिफिकेशन काढण्याचे आश्वासन

मुख्यमंत्री देवेंद्र फडणवीस यांना निवेदन देताना मराठी पत्रकार परिषदेचे पदाधिकारी

मुंबई : प्रतिनिधी 

     पत्रकार संरक्षण कायद्याचं नोटिफिकेशन लवकर काढण्यात येईल, पत्रकार सन्मान योजनेच्या अटी शिथिल करण्यात येतील. असे आश्वासन मुख्यमंत्री देवेंद्र फडणवीस यांनी आज मुंबईत दिले. पत्रकारांच्या दहा संघटनांनी एकत्र येत स्थापन केलेल्या 'पत्रकार अभिव्यक्ती संरक्षण मंच'च्या वतीने आज मुख्यमंत्र्यांची भेट घेण्यात आली. यावेळी ते पत्रकार  संघटनेच्या पदाधिकाऱ्यांसमोर बोलत होते.

    जनसुरक्षा विधेयकाच्या संदर्भातील आक्षेप आणि शंकाच्या संदर्भात सह्याद्रीवर ही बैठक झाली. बैठकीस गृह विभागाचे वरिष्ठ अधिकारी उपस्थित होते. बैठकीच्या अखेरीस पत्रकारांची मातृसंस्था मराठी पत्रकार परिषदेचे मुख्य विश्वस्त एस. एम. देशमुख यांनी पत्रकार संरक्षण कायद्याचा मुद्दा उपस्थित केला. "पत्रकार संरक्षण कायदा झाला पण कायद्याचं नोटिफिकेशन निघाले नसल्याने राज्यात कायदा अंमलात आलेला नाही. ही बाब निदर्शनास आणून दिली. त्यावर मुख्यमंत्र्यांनी तात्काळ नोटिफिकेशन काढण्याची सूचना गृहसचिवांना केली.

    पत्रकार सन्मान योजनेचे नियम अत्यंत जाचक असल्याने बहुसंख्य ज्येष्ठ पत्रकार या योजनेपासून वंचित आहेत. तेव्हा नियम शिथिल करण्याची मागणी देशमुख यांनी केली. मुख्यमंत्र्यांनी या मागणी संबंधी काय करता येईल? याबाबत संबंधीत अधिका-यांना सुचना दिल्या.