चंदगड शहरालगतच्या विनायक नगर जंगल परिसरात दोन गव्यांची झुंज, एका गव्याला पायाला दुखापत, वनविभागाचे वन्यप्राण्यांपासून सुरक्षित अंतर राखण्याचे आवाहन

 

चंदगड - प्रतिनीधी / चेतन शेरेगार

    चंदगड शहरापासून जवळच असलेल्या विनायक नगर येथील जंगलालगतच्या परिसरात आज सकाळी दोन गव्यांमध्ये जोरदार झुंज झाल्याची घटना समोर आली. प्रत्यक्षदर्शींनी सांगितल्यानुसार, या दोन्ही ताकदवान गव्यांमध्ये झालेल्या संघर्षात एक गवा गंभीररीत्या जखमी झाला असून त्याच्या पायाला दुखापत झाल्यामुळे तो जागेवरच बसून राहिला.

    घटनेनंतर परिसरात नागरिकांनी मोठ्या प्रमाणात गर्दी केली होती. काही वेळ तणावपूर्ण वातावरण निर्माण झाले होते. वनविभागाला याची माहिती मिळताच अधिकारी घटनास्थळी दाखल झाले आणि त्यांनी पाहणी करून परिस्थितीचा आढावा घेतला.

    वन्यजीव तज्ज्ञांच्या मते, हा प्रकार प्रजनन काळातील वर्चस्वासाठी होणाऱ्या संघर्षाचा भाग असू शकतो. जंगल परिसरात असे संघर्ष अधूनमधून दिसून येतात, विशेषतः मोठ्या प्रजातींमध्ये. सध्या जखमी गव्याची स्थिती वनविभागाच्या निरीक्षणाखाली असून त्याच्यावर पुढील उपचार किंवा बचाव कार्याबाबत निर्णय घेतला जाणार आहे. वनविभागाने नागरिकांना अशा घटनांदरम्यान जंगल परिसरात गर्दी न करण्याचे आणि वन्यप्राण्यांपासून सुरक्षित अंतर राखण्याचे आवाहन केले आहे.