आपल्या सभोवतालचे निरीक्षण हेच संशोधन - डॉ. नंदकुमार मोरे

हलकर्णी (ता. चंदगड) येथे डॉ. नंदकुमार मोरे यांचा सत्कार करताना दौलत विश्वस्थ संस्थेचे सचिव विशाल पाटील, बाजूला प्राचार्य अजळकर, प्रा. गवळी, प्रा. घोरपडे आदी

चंदगड / सी. एल. वृत्तसेवा

        "संशोधन हे कुतूहलातून निर्माण होते. आपल्या सभोवतालाचे कुतूहलपूर्वक, जिज्ञासापूर्वक निरीक्षण करा, या निरीक्षणातूनच संशोधनासाठी विषय प्राप्त होतील' असे मत शिवाजी विधापीठ मराठी विभाग प्रमुख डॉ. नंदकुमार मोरे यांनी मांडले. शिवाजी विद्यापीठ आणि चंदगड तालुक्यातील हलकर्णी (ता. चंदगड) येथील यशवंतराव चव्हाण महाविद्यालय यांच्या संयुक्त विद्यमाने आयोजित ज्ञानविस्तार मानव्य व्याख्यानमाला संपन्न झाली. या व्याख्यानमालेत प्रमुख वक्ते या नात्याने ते बोलत होते.

        ते पुढे म्हणाले, शाळा-महाविद्यालयाचे दिवस खूप सुंदर आणि आनंददायी असतात. या काळात खूप वाचन, निरीक्षण करावयास हवे. येथेच आपल्या भावी आयुष्याच्या वाटा ठरत असतात. विद्यार्थी जीवनातच उच्चशिक्षण आणि संशोधनाची दिशा निश्चित होत असते. इतिहास, समाजशास्त्र, अर्थशास्त्र भूगोल अशा विषयातील ज्ञानही सर्व विद्यार्थ्यांनी घ्यावयास हवे. नवीन शैक्षणिक धोरणात आंतरविद्याशाखीय शिक्षणाला महत्त्व आले आहे. या धोरणात भाषांना मुख्य स्थान दिले आहे. प्रादेशिक भाषा व बोलीत मुलांना शिकविले पाहिजे, असा या धोरणात आग्रह आहे, त्यामुळे नवीन पिढीतील विद्यार्थ्यांनी या सर्व गोष्टींचा फायदा घेऊन उच्चशिक्षण घ्यावे. आपल्या पर्यावरण, आरोग्यास, निसर्गास व समाजास उपयोगी पडेल असे संशोधन करावे.   

        या व्याख्यानमालेच्या अध्यक्षस्थानी दौलत विश्वस्थ संस्थेचे सचिव  विशाल पाटील होते. उच्चशिक्षणाबरोबरच विद्यार्थ्यांनी कौशल्यावर भर द्यावा पदवी घेण्याबरोबरच विविध कौशल्ये विद्यार्थ्यांनी आत्मसात करून आपले व्यक्तिमत्व विकसित करावे असे त्यांनी सूचित केले. या प्रसंगी  दौलत विश्वस्त संस्थेचे उपाध्यक्ष संजय पाटील तसेच महाविद्यालयाचे प्राचार्य डॉ. बी. डी. अजळकर उपस्थित होते व्याख्यानमालेचे प्रास्ताविक प्रा. एस. एन. खरुजकर यांनी केले. पाहुण्याची ओळख व आभार प्रा. पी. ए. पाटील यांनी केली. सूत्रसंचालन डॉ. चंद्रकांत पोतदार यांनी केले. व्याख्यानमालेचे समन्वयक डॉ. अनिल गवळी होते. यावेळी डॉ. आय. आर. जरळी, प्रा. यु. एस. पाटील, प्रा. व्ही. व्ही. कोलकार, प्रा. सुवर्णा पाटील, प्रा. एस. एन. पाटील, प्रा. के. एम. गोनुगडे, नॅक समन्वयक डॉ. राजेश घोरपडे, सहसमन्वयक डॉ. ज्योती व्हटकर यांच्यासह इतर प्राध्यापक व विद्यार्थी उपस्थित होते.