राज्यपालांच्या हस्ते महाराष्ट्रातील विविध बोलींचा अभ्यास असलेल्या ग्रंथाचे प्रकाशन, जनता विद्यालयतील बी. एन. पाटील यांच्या चंदगडी बोलीतील कथेचा समावेश

 

चंदगड : सी. एल. वृत्तसेवा

         महाराष्ट्राचे राज्यपाल रमेश जी बैस यांच्या  हस्ते डॉ. मोनिका ठक्कर यांचे ‘माझी बोली माझी कथा’ या पुस्तकाचे प्रकाशन मंगळवारी दि. ४ एप्रिल रोजी मुंबईतील राजभवन येथे झाले. 

 आपल्या महाराष्ट्रात मराठी भाषेला समृद्ध करणाऱ्या विविध बोली बोलल्या जातात, ज्या आज नामशेष होत चालल्या आहेत. या बाबतचा विचार करून बोलींचे जतन आणि संवर्धन व्हावे या दृष्टीने तसेच वाचकांना ते रंजक वाटावे या उद्देशाने आणि आपल्या महाराष्ट्रात बोलल्या जाणार्‍या बोली याचे ज्ञान जनसामान्य, महाविद्यालय व विद्यालय स्तरावरही विद्यार्थ्यांना मिळावे, बोलींच्या अभ्यासाकडे कल वाढावा या हेतूने महाराष्ट्रातील विविध बोलीतील कथा संकलित करून सोबतच त्याचा कथासार, कठीण शब्दांचे अर्थ, त्या-त्या बोली विषयी अभ्यासपूर्ण माहिती तसेच लेखकांचा थोडक्यात परिचय अशा धाटणीचा हा ग्रंथ आहे. 

       सदर ग्रंथात ५७ बोलीतील ५७ कथा असून प्रत्येक कथा त्या-त्या बोलीतील अभ्यासक लेखकांनी लिहिल्या आहेत. दिग्गज लेखक मंडळींनी या ग्रंथाला आपले योगदान देऊन समृद्ध केले आहे. बोलीविषयक असा प्रयोग महाराष्ट्रात प्रथमच या ग्रंथाच्या रूपाने झाला आहे. माझी बोली, माझी कथा’ असे या ग्रंथाचे नाव असून, या ग्रंथाचे प्रकाशन लोकायन प्रकाशन संस्था यांनी केले आहे.आजवर संशोधनात्मक लेखन आणि संपादन केलेल्या १२ ग्रंथांचा अनुभव पाठीशी घेऊन महाराष्ट्रातील विविध बोलीतील सदर अभ्यासपूर्ण ग्रंथाचे संकलन, संपादन आणि समन्वयाची भूमिका डॉ. मोनिका ठक्कर यांनी सांभाळली आहे. 

महाराष्ट्राचे राज्यपाल रमेश जी बैस यांच्या हस्ते मुंबईतील राजभवन येथे नुकताच ‘माझी बोली माझी कथा’ या ग्रंथाचे प्रकाशन संपन्न झाले. त्या प्रसंगी प्रत्येक प्रांतात बोली या विषयी अभ्यास होणे गरजेचे आहे आणि ते ग्रंथ स्वरुपात असल्यास ते पुढच्या पिढीला मार्गदर्शक ठरेल आणि आपल्या मातृभाषेचा सार्थ अभिमान आपण बाळगायला हवा असे प्रतिपादन करून या स्तुत्य उपक्रमाबद्दल त्यांनी डॉ. मोनिका ठक्कर यांचे विशेष कौतुक केले. या प्रसंगी प्रकाशन संस्थेचे सदस्य उपस्थित होते.    

चंदगड तालुक्यातील जनता विद्यालय तुर्केवाडीतील ग्रामीण कथा लेखक बी. एन. पाटील यांच्या चंदगडी बोलीतील कथेचा समावेश या ग्रंथात झाल्यामुळे पुन्हा एकदा चंदगडीबोलीचा डंका महाराष्ट्रभर वाजत आहे. बी.एन पाटील यांचे तीन कथासंग्रह व एक काव्यसंग्रह प्रकाशित झाले आहेत. श्री. पाटील यांना जनता शिक्षण संस्थेचे सचिव जी. एन. पाटील व चंदगड मराठी अध्यापक संघाचे मार्गदर्शन लाभले.