चंदगड / सी. एल. वृत्तसेवा
छत्रपती शिवाजी महाराज आणि छत्रपती संभाजी महाराज यांच्या शौर्य, त्याग आणि स्वराज्यनिष्ठेचा जागर करण्यासाठी चंदगड तालुक्यातील ऐतिहासिक किल्ले श्री पारगड येथे सोमवार, दि. ९ नोव्हेंबर २०२६ रोजी भव्य दीपोत्सव व मशाल महोत्सवाचे आयोजन करण्यात आले आहे. हिंदुराष्ट्र सेना व श्री राम सेना, चंदगड, कोल्हापूर यांच्या वतीने आयोजित करण्यात आलेल्या या महोत्सवाचे हे पहिले वर्ष आहे. ऐतिहासिक वारशाचे जतन, दुर्गसंवर्धन आणि शिवशंभूंच्या विचारांचा जागर या उद्देशाने हा उपक्रम राबविण्यात येणार आहे.
सोमवारी सकाळी ९ वाजता या उपक्रमाला सुरुवात होणार असून, सकाळी १० ते दुपारी ३ या वेळेत किल्ले पारगडावर स्वच्छता मोहीम राबविण्यात येणार आहे. ऐतिहासिक गड-किल्ले ही महाराष्ट्राची अस्मिता आणि पूर्वजांच्या पराक्रमाची साक्ष आहेत. या वास्तूंचे जतन करणे ही केवळ शासनाची जबाबदारी नसून प्रत्येक नागरिकाचे सामाजिक कर्तव्य आहे. याच भावनेतून गडाची स्वच्छता करून ऐतिहासिक वारशाच्या संवर्धनाचा संदेश दिला जाणार आहे.
प्रत्येक सहभागीने किमान पाच दिवे तसेच शिवज्योत व मशाल सोबत आणण्याचे आवाहन आयोजकांनी केले आहे. दीपोत्सवाच्या माध्यमातून गडावर प्रकाशाची आरास साकारत छत्रपती शिवाजी महाराज आणि छत्रपती संभाजी महाराज यांच्या पराक्रमाला अभिवादन करण्यात येणार आहे. मशाल महोत्सवाच्या माध्यमातून स्वराज्याची प्रेरणा, शौर्य, त्याग आणि राष्ट्रनिष्ठेचा संदेश जनमानसात पोहोचविण्याचा प्रयत्न केला जाणार आहे.
युवकांनी गडसंवर्धनासाठी पुढे यावे!
या उपक्रमात सहभागी होणाऱ्यांनी गडाच्या स्वच्छतेसाठी आवश्यक साधने सोबत आणावीत. आयोजकांकडून नाश्ता व भोजनाची व्यवस्था करण्यात आली आहे. तसेच मुक्कामाचे नियोजन लक्षात घेऊन प्रत्येकाने स्वतःचे अंथरूण सोबत आणावे. सर्व शिवप्रेमी, दुर्गप्रेमी, युवक आणि इतिहासप्रेमींनी वेळेत उपस्थित राहून या ऐतिहासिक उपक्रमात सक्रिय सहभाग नोंदवावा, असे आवाहन आयोजकांनी केले आहे.
संपर्क : ८१९७४३३२४५, ९९२१३१४९२७, ७०६६१९७५४५
इतिहासाचा अभिमान, गड-किल्ल्यांचे संवर्धन आणि शिवशंभूंच्या पराक्रमाचा जागर अशा त्रिसूत्रीवर आधारित हा दीपोत्सव पारगडाच्या ऐतिहासिक वैभवात भर घालणारा ठरणार आहे.
No comments:
Post a Comment