मराठी पत्रकार परिषदेच्या अधिवेशनाचे उद्घाटन राष्ट्रवादीचे अध्यक्ष शरद पवार यांच्या हस्ते होणार, खास.अमोल कोल्हे स्वागताध्यक्ष

 

बारामती येथे राष्ट्रवादीचे अध्यक्ष शरद पवार यांना अधिवेशनाचे निमंत्रण देतांना मुख्य विश्वस्त एस . एम . देशमुख , कार्याध्यक्ष शरद पाबळे , समन्वयक सुनिल जगताप , पुणे जिल्हाध्यक्ष सुनिल लोणकर , सोशल मिडीया जिल्हाध्यक्ष जनार्दन दांडगे , बारामती तालुकाध्यक्ष हेमंत गडकरी , तालुकाध्यक्ष राजेंद्र काळभोर आदि

बारामती/प्रतिनिधी 

मराठी पत्रकार परिषदेच्या ४४ व्या राष्ट्रीय पत्रकार अधिवेशनाला माजी कृषिमंत्री व राष्ट्रवादी काँग्रेसचे अध्यक्ष शरद पवार उपस्थित राहणार असून अधिवेशनाचे उद्घाटन त्यांच्या हस्ते होणार आहे . सुप्रसिद्ध अभिनेते व शिरुरचे खासदार डॉ . अमोल कोल्हे अधिवेशनाचे स्वागताध्यक्ष असून मराठी पत्रकार परिषदेचे ४४ वे राष्ट्रीय अधिवेशन पुणे जिल्ह्यातील उरळीकांचन या ठिकाणी १८ व १ ९ डिसेंबर रोजी पार पडणार आहे . अधिवेशनाची जय्यत तयारी सुरु असून देश व राज्यभरातील सुमारे दोन हजाराहून अधिक पत्रकार बांधव या दोन दिवसीय अधिवेशनाला उपस्थित राहणार आहेत . मराठी पत्रकार परिषदेचे मुख्य विश्वस्त एस . एम . देशमुख यांच्या अध्यक्षतेखाली मराठी पत्रकार परिषदेच्या शिष्टमंडळाने आज बारामती येथील गोविंदबाग या शरद पवार यांच्या निवासस्थानी त्यांची भेट घेतली . यावेळी शिष्टमंडळातील सदस्यांशी शरद पवारांनी अधिवेशनाबाबत सविस्तर चर्चा केली . अधिवेशनाला उपस्थित राहण्याबाबत अनुकूलता दर्शवली . यावेळी मराठी पत्रकार परिषदेचे मुख्य विश्वस्त एस . एम . देशमुख , कार्याध्यक्ष शरद पाबळे , समन्वयक सुनील जगताप , पुणे जिल्हा पत्रकार संघाचे अध्यक्ष सुनील लोणकर , सोशल मीडिया चे जिल्हाध्यक्ष जनार्दन दांडगे , बारामती तालुका मराठी पत्रकार संघाचे अध्यक्ष हेमंत गडकरी व यजमान हवेली तालुका पत्रकार संघाचे अध्यक्ष राजेंद्र काळभोर उपस्थित होते.