भारत सरकार दिल्ली यांच्या मार्फत घेण्यात आलेल्या राष्ट्रीय शास्त्रीय गायन स्पर्धेत शिवनगे (ता. चंदगड) गावची कुमारी सानिया धनाजी मुंगारे हिने संपूर्ण भारत देशात राष्ट्रीय गायन स्पर्धेत प्रथम क्रमांक मिळवून एक नवा उच्चांक प्रस्थापित केला. चंदगडच्या स्वरांनी दिल्ली मंत्रमुग्ध झाली.
ग्रामीण भागातून आपल्या गायन कलेला सुरुवात केलेल्या या विद्यार्थिनीने शालेय जीवनात अनेक स्पर्धांतून बक्षिसे पटकावली आहेत. कलर टीव्ही आणि झी टीव्ही वर झालेल्या अनेक स्पर्धाच्यामध्ये तिने आपला सहभाग नोंदवला आहे. बालवयातच अनेक गीत गायन स्पर्धेची बक्षीस मिळवून चंदगडच्या शिरपेचात गायनाचा मुकुट सानिमाने रोवला आहे.
गायन क्षेत्रातील ही तारका अशीच चमकत राहण्याच्या शुभेच्छा सर्व चंदगड वासीयानी दिल्या. दिल्लीच्या दरबारात शास्त्रीय गायनाचा झेंडा फडकवण्याचा अभिमान चंदगडकराना नेहमीच राहील.
माझ्या स्वरांनी गावी
माझ्या गावाचीच गाणी
शब्दांशब्दांतूनी वहावे
ताम्रपणीचेचं पाणी
हे स्वप्न उराशी बाळगून गाण्यांच्या दुनियेतील सानियाचा प्रवास खरचं थक्क करणारा आहे. नव्हे आजच्या टिव्ही आणि मोबाईलमध्ये स्वतःला गुंतुन घेणाऱ्या मुलांसाठी आदर्शवत आहे. ताम्रपर्णी विद्यालय, शिवणगे येथून इ.१०वीच्या परीक्षेला सामोरे जाताना अभ्यास आणि गाणं यांचा छान मेळ जमवला होता.
स्वर्गीय स्वरमाधूर्याचा मूर्तीमंत अवतार असणाऱ्या सानियाला प्रभात समयीची कोवळी किरणे, दवबिंदूंनी भिजलेल्या शाईने कमल तंतूच्या लेखनीने आणि वायू लहरीच्या हलक्या हाताने फुलपाखराच्या पंखावर लिहिलेले मानपत्र गुलाब फुलाच्या करंडकातुन तिला अर्पण करायला हव.
चंदगड म्हणजे मागास भाग हा शिक्का पुसून एक नवी ओळख उभ्या महाराष्ट्राला सानियाच्या रुपाने पुन्हा एकदा मिळाली. खरं तर चंदगड म्हणजे चंदनासारखी दरवळणारी, आपल्या किर्तीचा सुगंध पसरणारी माणसं. सानियाने आपल्या स्वरांनी सिद्ध करून दाखवलं.
महाराष्ट्राचे पंचमदा म्हणून ज्यांना ओळखलं जातं ते पंडीत हृदयनाथ मंगेशकर यांचा आशीर्वाद मिळणं केवढं मोठ भाग्य! आणि हाच क्षण सानियाच्या आयुष्यातील टर्निंग पॉईंट ठरला.
कलर्स मराठीवरील 'सूर नवा ध्यास नवा ' या वाहिनीवरील छोटे सूरवीरसाठी सानियाची निवड झाली आणि चंदगडी स्वर महाराष्ट्राच्या कानाकोपऱ्यात घुमू लागला. गल्लीपासून सुरू झालेला सानियाचा संगीत प्रवास थेट दिल्लीपर्यंत येऊन पोहचला. हे सर्व करत असताना सानियानेअभ्यासाची हेळसांड होऊ दिली नाही. सप्तसुरांच्या मैफिलीत तीचा प्रवास सुरूच होता. प्रचंड जिद्द, भरपूर सराव आणि स्वतःशीच स्पर्धा असली की जगात अशक्य काहीच नाही. हा नवा मंत्र सानियाने आजच्या भरकटलेल्या मुलांना नकळत देऊन गेला. २०२० साली झालेल्या कला उत्सव या राष्ट्रीय शास्त्रीय गायन स्पर्धेत महाराष्ट्रात प्रथम तर आता देशात प्रथम क्रमांक पटकावलेल्या सानियाचे सर्वत्र अभिनंदन केले जात आहे.
No comments:
Post a Comment