कोवाडच्या वल्लभ पाटीलची आशिया कप रग्बी स्पर्धेसाठी भारतीय संघात निवड

 

वल्लभ पाटील 

चंदगड : सी. एल. वृत्तसेवा

      उद्यापासून नेपाळ येथे सुरू होणाऱ्या आशिया सेव्हन्स कप रग्बी स्पर्धेसाठी कोवाड महाविद्यालयाचा खेळाडू वल्लभ रामचंद्र पाटील (मुळगाव मलतवाडी (ता. चंदगड) याची भारतीय संघात निवड झाली आहे. ४ व ५ ऑक्टोबर २०२४ रोजी नेपाळमधील काठमांडू शहरात होणाऱ्या या स्पर्धेत आशिया खंडातील दिग्गज १७ देशांचे संघ सहभागी होणार आहेत.

वल्लभ पाटील सह निवडण्यात आलेल्या भारतीय संघातील खेळाडू व अधिकारी

    वल्लभ गेल्या दोन महिन्यापासून कोलकत्ता येथे झालेल्या शिबिरात सराव करत होता. या शिबिरातून अंतिम १२ खेळाडूंत त्याची निवड झाली. ४ गटात खेळल्या जाणाऱ्या स्पर्धेच्या ड गटात भारत, अफगाणिस्तान, बांगलादेश व चायनीज तैपेई देशाचे संघ सहभागी आहेत. साखळी फेरीतील सामन्यांनंतर दुसऱ्या फेरीतील सामने नॉक आऊट पद्धतीने होणार आहेत.

   वल्लभ ला याकामी पुणे रग्बी असोसिएशन, महाराष्ट्र रग्बी असोसिएशन व इंडियन रग्बी असोसिएशनच्या सर्व पदाधिकाऱ्यांचे मार्गदर्शन व सहकार्य लाभले. राज्य व राष्ट्रीय पातळीवरील धावपटू म्हणून प्रसिद्ध असलेल्या वल्लभने रग्बी सारख्या महाराष्ट्रातील ग्रामीण भागासाठी अतिशय नवख्या असलेल्या क्रीडा प्रकारात घेतलेली भरारी कौतुकास्पद असून तालुका व जिल्हा स्तरावरील होतकरू खेळाडूंसाठी निश्चितच दिशादर्शक ठरणारी आहे. त्याच्या निवडीबद्दल क्रीडा व विविध स्तरांतून अभिनंदन होत आहे.