हैदराबाद मुक्तिसंग्रामातील स्वातंत्र्य सेनानी सखाराम बापू फदाट यांचे ९५ व्या वर्षी निधन

 

सखाराम बापू फदाट- पाटील

जालना : सी एल वृत्तसेवा 

   बोरगाव, ता. जाफ्राबाद, जि. जालना येथील गांधीवादी विचारांचे ज्येष्ठ स्वातंत्र्यसैनिक सखाराम बापू फदाट- पाटील यांचे वयाच्या ९५ व्या वर्षी राहत्या घरी १/डिसेंबर २०२४ रोजी निधन झाले.  प्रेमळ स्वभावामुळे संपूर्ण जाफराबाद तालुक्यात 'बापू' या नावाने सुपरीचीत होते. बोरगाव येथे त्यांच्या अंत्यसंस्कार प्रसंगी हजारोंचा जनसमुदाय उपस्थित होता.

   सखाराम बापूंचा जन्म बोरगाव बुद्रुक, ता. जाफराबाद येथे झाला.  त्यांचे वडील तुकाराम फटाट हे निजाम शासनाविरुद्धच्या चळवळीत सहभागी होते. वडिलांच्या पश्चात सखाराम बापू तरुण वयातच निजाम शासनाविरुद्धच्या लढ्यात सक्रिय झाले होते. बापूंच्या हैद्राबाद मुक्तीसंग्रामातील योगदानाची दखल घेऊन महाराष्ट्र शासनाने त्यांचा स्वातंत्र्य सैनिक सन्मानपत्र देऊन गौरव केला होता.

   सखाराम बापू यांच्या राजकीय कारकिर्दीची सुरुवात बोरगाव बुद्रुक गावाच्या सरपंच पदापासून झाली. गावाच्या विकासासाठी त्यांची धडपड व सर्वांच्या सुखदुखात धावून जाण्याच्या त्यांच्या स्वभावामुळे गावकऱ्यांनी त्यांना सलग ४० वर्ष सरपंच पदी निवडून दिले होते. हा एक विक्रमच म्हणावा लागेल. म्हणूनच परगावातील लोक बोरगावला 'बापुंचे बोरगाव' म्हणूनही ओळखत. त्यांनी जाफराबाद तालुका पंचायत समितीचे सभापती पदही भूषवले, त्यांच्या कार्यकाळात जाफराबाद तालुक्यातील अनेक विकास कामे मार्गी लागली. ते औरंगाबाद जिल्हा परिषदेचे सदस्य म्हणूनही निवडून आले होते. त्यांच्या कार्यकाळात त्यांनी स्वतंत्र जालना जिल्हा निर्मितीसाठी खूप प्रयत्न केले. 

मराठवाड्याचे आर्थिक व सामाजिक मागासलेपण दूर करण्यासाठी बापूंनी त्याकाळी वेगळे मराठवाडा राज्य निर्मिती करण्याचीही मागणी केली होती. 

  २ डिसेंबर रोजी सखाराम बापूंवर बोरगाव बु. येथे अंतिम संस्कार करण्यात आले. या स्वातंत्र सैनिकाला शेवटचा निरोप देण्यासाठी हजारोंच्या संख्येने नागरिक उपस्थित होते. सखाराम बापूंचे कार्य लक्षात घेऊन शासनाद्वारे त्यांच्यावर शासकीय इतमामात अंतिम संस्कार करण्यात आले. याप्रसंगी शासकीय प्रतिनिधी तहसीलदार सारिका भगत व पोलीस निरीक्षक इंगळे  व पोलिस पथकाने बापूंना पुष्पचक्र अर्पण करून त्यांना अंतिम निरोप दिला. यावेळी विविध राजकीय पक्षांचे नेते पदाधिकारी उपस्थित होते.  अनेक मान्यवरांनी बापूंच्या हैदराबाद मुक्तिसंग्रामातील योगदानावर प्रकाश टाकला.

  बापूंच्या निधनाने जाफराबाद तालुक्याच्या राजकीय इतिहासातील एक तेजस्वी तारा काळाच्या पडद्याआड गेल्याने सगळीकडे हळहळ व्यक्त होत आहे.

 

फोटो

स्वातंत्र्य सैनिक सखाराम बापू फादर पाटील 

अंत्यसंस्कार प्रसंगी उपस्थित शासकीय अधिकारी व जनसमुदाय