सहावे अखिल भारतीय बेळगाव मराठी साहित्य संमेलन ६ एप्रिल रोजी बेळगावात

 

डी. बी. पाटील 

बेळगाव : सी एल वृत्तसेवा

      भारतीय मराठी साहित्य परिषद आणि मराठा मंदिर यांच्या संयुक्त विद्यमाने आयोजित ६ वे अखिल भारतीय बेळगाव मराठी साहित्य संमेलन संमेलन ६ एप्रिल २०२५ रोजी मराठा मंदिर, बेळगाव येथे भव्य स्वरूपात पार पडणार आहे. संमेलनाच्या स्वागताध्यक्षपदी डी. बी. पाटील यांची निवड करण्यात आली आहे. त्यांच्या सामाजिक, शैक्षणिक आणि सांस्कृतिक योगदानाच्या गौरवार्थ त्यांची ही निवड करण्यात आली आहे. निवडीची अधिकृत घोषणा साहित्य परिषदेचे राजाध्यक्ष रवींद्र पाटील आणि जिल्हाध्यक्ष ॲड सुधीर चव्हाण यांनी केली. संमेलनाध्यक्ष म्हणून ज्येष्ठ साहित्यिक व पानिपतकार विश्वास पाटील यांची निवड झाली आहे. याशिवाय डॉ. संजय कळमकर (दुसरे सत्र) आणि जागर लोकसंस्कृतीचे शाहीर अभिजीत कालेकर (तिसरे सत्र) यांचे व्याख्यान होणार आहे. 

    डी. बी. पाटील हे एक अष्टपैलू व्यक्तिमत्त्व असून, त्यांनी शिक्षक, छायाचित्रकार, समाजसेवक, रोटरी क्लब ऑफ वेणुग्राम-बेळगावचे अध्यक्षपद भूषवले असून, त्यांच्या कार्यकाळात ३१० हून अधिक सामाजिक प्रकल्प यशस्वीपणे राबवण्यात आले. ते बेळगाव फोटो आणि व्हिडिओग्राफी असोसिएशनचे अध्यक्ष आहेत तसेच राष्ट्रीय दैनिक ‘द हिंदू’चे पत्रकार म्हणूनही त्यांनी उल्लेखनीय कार्य केले आहे. संमेलनासाठी हजारोंच्या संख्येने उपस्थित राहून मराठी अस्मिता दाखवून द्यावी. असे आवाहन संयोजकांच्या वतीने करण्यात आले आहे.