चंदगड तालुका पृथ्वी वरील स्वर्ग...! ॲड. संतोष मळवीकर, १ लाख वृक्षारोपण निमित्त वन खात्याकडून सन्मान

  

ॲड. संतोष मळवीकर यांचा, १ लाख वृक्षारोपण निमित्त वन खात्याकडून सन्मान

कालकुंद्री : सी एल वृत्तसेवा 

           चंदगड तालुक्यातील पर्यावरण प्रेमी वकील ॲड. संतोष मळवीकर यांनी १ लाखांपेक्षा जास्त वृक्षारोपण करुन केलेले कार्य समाजासमोर आदर्श ठेवणारे व कौतुकास्पद आहे. असे गौरवोद्गार वनपाल कृष्णा डेळेकर यांनी व्यक्त केले.  एक लाख रुपये करून तयार करून ती मोफत वाटणे व वृक्षारोपणाचे मोठे सामाजिक कार्य केल्याबद्दल त्यांचा वनविभागाच्या वतीने नुकताच प्रशस्तीपत्र देऊन सन्मान करण्यात आला. 

           परिक्षेत्र वन अधिकारी टी. आर. गायकवाड यांनी ॲड. मळवीकर यांनी केलेल्या कामाची प्रशंसा करताना भविष्यातही वृक्ष लागवड व जनजागृतीसाठी मळविकर यांचा सहभाग लाभावा अशी अपेक्षा व्यक्त केली. यावेळी बोलताना मळवीकर म्हणाले, "माझ्या जीवनात मी ३३ देश फिरलो, पण भारतासारखा देश कुठेच नाही. त्यातही चंदगड तालुका हा पृथ्वीवरील  स्वर्गच आहे, परंतु वृक्षतोडीचा फटका आपल्याला बसला आहे. आता झाडे लावण्याइतकेच त्यांचे संवर्धन करणे ही आपली जबाबदारी आहे. वयाच्या चाळीशीपर्यंत मी एक लाख रोपांची निर्मिती केली असून आता आणखी एक लाख झाडे जगवण्याचे उद्दिष्ट ठेवले आहे.

        सूत्रसंचालन कृष्णा डेळेकर यांनी केले. यावेळी श्रीमती वर्षदा काणकेकर परिमंडळ वन अधिकारी सागर पाटील, संपत पेडणेकर, दयानंद गावडे, प्रकाश गावडे, संभाजी मळवीकर यांच्यासह वनरक्षक, वनसेवक, वन्यजीव बचाव पथकातील सदस्य तसेच संतोष हळदणकर, दत्तू पेडणेकर आदींची उपस्थिती होती.

फोटो 

 चंदगड येथील वन कार्यालयामार्फत ॲड संतोष मळवीकर यांचा सत्कार करताना वन अधिकारी व कर्मचारी