नाटक हा मराठी रसिकांचा श्वास -अनिल गवस, हलकर्णी फाटा येथे नाट्यमहोत्सवाला सुरवात

हलकर्णी फाटा  ता चंदगड येथील चंदगडी नाट्य महोत्सव उद्धाटन प्रसंगी बोलताना अभिनेते अनिल गवस,बसलेले आमदार राजेश पाटील, माजी सभापती शांताराम पाटील,द य कांबळे, अविनाश पाटील 

चंदगड / प्रतिनिधी

नाटक हे मराठी नाट्य रसिकांचा श्वास आहे . नाटक बघताना माणूस स्वत : ला हरवून जातो . नाटक जगण्याला बळ देते . तसेच दैनंदिन जीवनातील समस्या सोडवायला देखील मदत करते . माणूस म्हणून आपण सर्वांनी एकमेकाशी माणुसकीच्या नात्याने वागूया आणि जीवनातील आनंद उपभोगुया असे प्रतिपादन नाट्यकर्मी छत्रपती संभाजी मालिकेतील प्रसिद्ध हंबिरराव मोहिते फेम अनिल गवस यांनी केले . हलकर्णी फाटा ( ता . चंदगड ) येथे साई नाट्यधारा संस्थेच्या वतीने आयोजित नाट्यमहोत्सव कार्यक्रमाचे उद्घाटप्रसंगी ते बोलत होते . अध्यक्षस्थानी अविनाश पाटील होते . नाट्यमहोत्सवाचे उद्घाटन आमदार राजेश पाटील यांच्या हस्ते झाले.

कुडाळ येथील साई कलामंचच्या कलाकारांनी सादर केलेला ' तुझ्यात जीव रंगला ' या नाटकाने महोत्सवाची सुरवात झाली . सचिव परसू गावडे यांनी चंदगड तालुक्यात नाट्य चळवळ रूजवण्यासाठी या महोत्सवाचे आयोजन केले असल्याचे प्रास्ताविकात सांगितले . गवस पुढे म्हणाले , " रंगभूमीवरील तुमचे काम अपरिहार्य आणि अस्सल असावे . नेमके हेच बऱ्याच जणांना जमत नाही . आपण करत असलेली भूमिका सर्वस्पर्शीय , अद्वितीय आणि मननीय असावी . ज्यांना अभिनेता व्हायचे आहे , त्यांना या गोष्टींचे भान असणे गरजेचे आहे . माणसाच्या जीवनात गुंतागुंत आहे , ही गुंतागुंत असणाऱ्या माणसाच्या हृदयाची स्पंदण ज्या रंगकर्मीला समजतात तोच रंगकर्मी अभिनयाचा अस्सलतेचा नमूना उभा करतो . " .

तुझ्यात जीव रंगला नाटकातील एक क्षण.

आम . राजेश पाटील म्हणाले , जनतेने आपल्याला मोठ्या विश्वासाने निवडून दिले असल्याने त्या विश्वासास पात्र राहून विकासाला चालना देणार आहे . तालुक्यात सर्वसोयीनीयुक्त असे नाट्यगृह उभा करण्याचा मानस असून नाट्यकला बालवयातच रूजवणे आवश्यक असल्याचे त्यांनी सांगितले . या वेळी तालुक्यातील जेष्ठ रंगकर्मी द . य . कांबळे यांचा सत्कार अभिनेते अनिल गवस यांच्या हस्ते स्मृतिचिन्ह देऊन करण्यात आला . या वेळी माजी सभापती शांताराम पाटील , वसंत निट्टरकर , मनोहर चांदेकर , आर . आय . पाटील , विष्णू गावडे उपस्थित होते . सूतसंचालन सुभाष बेळगावकर यानी केले तर आभार धनाजी पाटील यांनी मानले.