अखिल भारतीय कोळी समाजाचा सुवर्ण महोत्सव सुरतमध्ये, राष्ट्रपती रामनाथ कोविंद यांची प्रमुख उपस्थिती

 

तेऊरवाडी (एस .के. पाटील)

अखिल भारतीय आदिवासी कोळी समाज संघटनेचा सुवर्णमहोत्सव १४ व १५ मे , २०२२ रोजी गुजरातेतील सुरत येथे संपन्न होणार आहे. १४ मे रोजी राष्ट्रीय कार्यकारिणीची बैठक व १५ मे रोजी सुवर्ण महोत्सव कार्यक्रम आयोजित करण्यात आला आहे . या कार्यक्रमास अखिल भारतीय कोळी समाज संघटनेचे माजी अध्यक्ष तथा सध्याचे  भारताचे महामहिम राष्ट्रपती रामनाथजी कोविंद यांची प्रमुख उपस्थिती राहणार आहेत. यासह राष्ट्रीय अध्यक्ष अजितभाई पटेल व गुजरात , महाराष्ट्र , कर्नाटक , आंध्रप्रदेश , उत्तरप्रदेश , हिमाचल प्रदेश आदि राज्यातील कोळी समाजाचे आजी माजी मंत्री , आमदार व खासदार उपस्थित राहणार आहेत, अशी माहिती अखिल भारतीय कोळी समाज संघटनेचे कोल्हापूर जिल्हाध्यक्ष, प्रा बसवंत पाटील यांनी दिली .

 महाराष्ट्र राज्य कार्यकारिणीची सभा राज्याध्यक्ष परेशजी कांतिभाई कोळी यांच्या अध्यक्षतेखाली नुकतेच ठाणे येथे पार पाडली . या बैठकीत सुवर्ण महोत्सवी  राष्ट्रीय अधिवेशनाबाबत व महाराष्ट्रातील ९ % आदिवासी लोकसंख्येपैकी OTSP मधील  ५% अनुसूचित जमातींना त्यांच्या लोकसंखेच्या प्रमाणात लोकसभा ,राज्य विधानसभा व आदिवासी सल्लागार परिषदेवर प्रतिनिधित्व न मिळणे , आदिवासी विकास निधी न मिळणे , कोळी महादेव ,टोकरे कोळी अनुसूचित जमातीचे प्रमाणपत्र व वैद्यता प्रमाणपत्र सुलभरीत्या न मिळणे , राजेंद्र मरसकोल्हे या गुन्हेगारी पार्श्वभूमी असलेल्या व्यक्तीला राष्ट्रीय अनुसूचित जमाती आयोगावर केलेली नियुक्ती रद्द करणे आदि ज्वलंत समस्याबाबत चर्चा करण्यात आली. या प्रसंगी कार्याध्यक्ष सिध्दार्थजी कोळी , केंद्रीय कार्यकारिणी सदस्य महादेवबुवा शहाबाजकर , शंकरराव बटगेरी , मराठवाडा विभागीय अध्यक्ष व्यंकटजी मुद्दीराज आदी मान्यवर उपस्थित होते .

कोरोनाच्या पार्श्वभूमीवर दोन वर्षानंतर सुरत येथे होणाऱ्या अधिवेशनाला कोल्हापूर ,सातारा , सांगली , सोलापूर , पुणे जिल्ह्यातून बहुसंख्येने आदिवासी महादेव कोळी , टोकरे कोळी , मल्हार कोळी  बांधवानी  उपस्थित राहण्याचे आवाहन करण्यात येत आहे . दरम्यान कोल्हापूर जिल्हा कार्यकारिणी गठीत करण्यासाठी आदिवासी बांधवाची बैठक रविवार दि.१७ एप्रिल ,रोजी कसबा बावडा येथे आयोजित केली आहे या बैठकीस बहुसंख्येने उपस्थित रहावे असे आवाहन करण्यात येत आहे.