चंदगड : माडखोलकर महाविद्यालयात कॉ. कृष्णा मेणसे यांना आदरांजली - चंदगड लाईव्ह न्युज

16 January 2025

चंदगड : माडखोलकर महाविद्यालयात कॉ. कृष्णा मेणसे यांना आदरांजली


चंदगड / सी. एल. वृत्तसेवा

     संयुक्त महाराष्ट्राच्या चळवळीतील अग्रणी, कामगार कष्टकऱ्यांचे नेते, कॉ. कृष्णा मेणसे यांच्या निधनाबद्दल चंदगड येथील र. भा. माडखोलकर महाविद्यालयामध्ये शोकसभा आयोजित करून आदरांजली वाहण्यात आली. यावेळी महाविद्यालयाचे स्टाफ सेक्रेटरी प्रा. ए. डी. कांबळे यांनी शोक प्रस्ताव मांडून त्यांच्या विविध सामाजिक कार्याची माहिती दिली.

     यावेळी बोलताना महाविद्यालयाचे प्र. प्राचार्य डॉ. एस. डी. गोरल म्हणाले की, कॉ. कृष्णा मेणसे यांनी ७० वर्षाहून काळ श्रमिक, कष्टकरी, कामगार, शेतमजूर यांच्या न्याय हक्कासाठी संघर्ष केला.

       संयुक्त महाराष्ट्राच्या चळवळीत त्यांना तुरुंगवास झाला होता. तब्बल ११ महिन्याहून अधिक काळ त्यांनी कारावास भोगाला होता.भाषावर प्रांत रचनेनंतर कर्नाटकात अडकलेल्या बिदर, भालकी, बेळगाव, कारवार या प्रदेशातील मराठी भाषिक जनतेच्या भाषिक स्वातंत्र्याच्या लढ्यात ते नेहमीच अग्रेसर राहिले होते.सीमा लढा, कामगार कष्टकऱ्यांची आंदोलने करीत असताना पत्रकार म्हणून त्यांनी आपली वेगळी ओळख निर्माण केली होती. हेमंत या मासिका बरोबर साम्यवादी हे साप्ताहिक सुरु करून कष्टकऱ्यांच्या लढ्याला त्यांनी माध्यमात आणून त्यांना आवाज दिला होता.याबरोबर त्यांनी विपुल वैचारिक लेखन केले आहे. हो ची मिन्ह, बसवेश्वर ते ज्ञानेश्वर, गोटलेली धरती पेटलेली मने, असा लढलो असा घडलो, डॉ आंबेडकर आणि बुध्दधर्म, अशा तोडल्या बेड्या यासारख्या अनेक वैचारिक पुस्तकांचे लिखाणही त्यांनी केले आहे.

     विद्यार्थी आणि तरुण वयात कुस्तीपट्टू म्हणून त्यांचा बेळगाव परिसरात नावलौकिक होता. त्यांनी कुस्तीचे अनेक फड गाजविले होते.सत्यशोधक विचारांचा त्यांच्या जडणघडणीवर मोठा प्रभाव राहिला होता . राष्ट्रवीरकार शामराव देसाई यांच्या सोबत बेळगाव परिसरात सत्यशोधक विचाराच्या प्रचार आणि प्रसारात ते पुढाकारात राहिले होते. अशा लढाऊ कॉम्रेडच्या निधनाने सीमा भागासह महाराष्ट्राच्या सामाजिक स्तरात पोकळी निर्माण झाल्याचेही त्यांनी त्यांनी यावेळी सांगितले.

        यावेळी डॉ. ए. वाय. जाधव, डॉ. पी. एल. भादवणकर, डॉ. एस. डी. गावडे, डॉ. एस. एन. पाटील, प्रा. व्ही. के गावडे, डॉ. के. एन. निकम यांच्यासह बहुसंख्य प्राध्यापक व विद्यार्थी उपस्थित होते.

No comments:

Post a Comment