कालकुंद्री : सी एल वृत्तसेवा
गुढीपाडव्यानिमित्त बलभीम तालीम मंडळ व ग्रामस्थ निट्टूर (ता. चंदगड) यांच्यावतीने आयोजित निकाली कुस्त्यांच्या मैदानात सुमारे ८० चटकदार कुस्त्यांनी उपस्थित हजारो कुस्ती शौकिनांच्या डोळ्यांचे पारणे फेडले. यावेळी झालेल्या प्रथम क्रमांकाच्या कुस्तीत महाराष्ट्र चॅम्पियन पै कालीचरण सोलनकर याने सेनादलाच्या ऑल इंडिया चॅम्पियन पै. सुशांत तांबुळकर याला एक चाक डावावर पंधराव्या मिनिटाला चितपट केले. तर क्रमांक दोनच्या कुस्तीत कालीचरणचा सख्खा भाऊ महाराष्ट्र चॅम्पियन पै विश्वचरण सोलनकर याने महाराष्ट्र चॅम्पियन ऋषिकेश पाटील (बानगे) याला गुणावर पराभूत केले. प्रथम क्रमांक ची कुस्ती माजी आमदार राजेश पाटील यांच्या हस्ते लावण्यात आली. तर दोन दुसऱ्या क्रमांकाची कुस्ती आमदार शिवाजीराव पाटील, माजी मंत्री भरमूआण्णा पाटील आदी मान्यवरांच्या हस्ते लावण्यात आली. या कुस्ती मैदानाचे 'लाईव्ह प्रक्षेपण' चंदगड मतदारसंघाचे मुखपत्र चंदगड पत्रकार संघ संचलित 'सी एल न्यूज' वर हजारो प्रेक्षकांनी मोबाईलवर पाहण्याचा आनंद लुटला. चंदगड तालुक्यासह पुणे, मुंबई व महाराष्ट्राच्या कानाकोपऱ्यातून तसेच देश-विदेशातून हे थेट प्रक्षेपण पाहणाऱ्या प्रेक्षक व कुस्ती शौकिनांनी या उपक्रमाचे कौतुक केले.
No comments:
Post a Comment