डिजिटल मिडिया परिषदेचे राज्यव्यापी अधिवेशन ऐतिहासिक ठरेल...! देशमुख यांचा विश्वास

 

संभाजीनगर : प्रतिनिधी 

       अखिल भारतीय मराठी पत्रकार परिषदेची एक विंग असलेल्या डिजिटल मिडिया परिषदेचे पहिले राज्यस्तरीय अधिवेशन रविवार दिनांक १४ सप्टेंबर २०२५ रोजी संभाजीनगर येथे होत आहे. या अधिवेशनास राज्यभरातील एक हजार पत्रकार उपस्थित राहतील असा विश्वास मुख्य विश्वस्त एस. एम. देशमुख यांनी व्यक्त केला आहे.

       डिजिटल मिडियातील पत्रकारांची संख्या उत्तरोत्तर वाढत असून त्यांना संघटीत करून त्यांच्या प्रश्नांच्या सोडवणुकीबाबत अधिवेशनात विचार विनिमय  करून ठोस भूमिका घेतली जाणार आहे. "मुक्तपीठ" चे संपादक आणि नवा काळचे सल्लागार संपादक तुळशीदास भोईटे आणि "अभिव्यक्ती" युट्यूब चँनलचे संपादक रवींद्र पोखरकर मुख्य वक्ते म्हणून उपस्थित पत्रकारांना मार्गदर्शन करणार आहेत. डिजिटल आणि प्रिन्ट मिडियातील पत्रकारांनी अधिवेशनास मोठ्या संख्येनं उपस्थित राहावे असे आवाहन परिषदेचे विश्वस्त किरण नाईक, कार्यक्रमाचे संयोजक तथा संभाजीनगर जिल्हा अध्यक्ष बालाजी सूर्यवंशी यांनी केले आहे.

   अधिवेशनात उत्कृष्ट युट्यूब चँनल चालवून ते यशस्वी केलेल्या काही संपादकांचा सत्कार, स्थानिक निवृत्त पत्रकारांचा गौरव करण्यात येणार असून डिजिटल मिडिया परिषदेची राज्य कार्यकारिणी जाहीर करण्यात येणार असल्याची माहिती डिजिटल मीडिया परिषद अध्यक्ष अनिल वाघमारे यांनी दिली आहे. डिजिटल मिडिया परिषदेचे हे अधिवेशन ऐतिहासिक ठरेल असा विश्वास एस. एम. देशमुख यांनी पत्रकारांशी बोलताना व्यक्त केला आहे.