कोकरे - गव्याच्या हल्यात मृत्यूमुखी : वारसांना २५ लाखांची मदत मंजूर, ५ लाखांचा धनादेश कुटुंबियांकडे सुपुर्द

 

मृताच्या कुटुंबियांना मदतीचा धनादेश देताना वनविभागाचे अधिकारी

चंदगड / सी. एल. वृत्तसेवा

    कोकरे (ता. चंदगड) येथील पुंडलिक बापू सुभेदार (वय-५६) हे रामेवाडी या स्थानिक नावाने ओळखल्या जणाऱ्या शेतात गव्याच्या हल्यात मृत्यूमुखी पडले होते. त्यांच्या कुटुंबियांना वनविभागाच्या वतीने २५ लाख रुपयांची आर्थिक मदत मंजूर केली आहे. त्यापैकी तातडीची मदत म्हणून त्यांच्या पत्नी श्रीमती अनिता सुभेदार यांच्या नावाचा ५ लाख रुपयांचा धनादेश त्यांच्या कुटुंबियांच्याकडे सुपुर्द केला. या प्रसंगी चंदगडचे वनपरिक्षेत्र अधिकारी तुषार गायकवाड, वनपाल कृष्णा डेळेकर, वनपाल चंद्रकांत पावसकर,  सरपंच कोकरे, पोलीस पाटील, कोकरे व ग्रामस्थ उपस्थित होते.

    यासंदर्भात अधिक माहिती अशी की, दि. १४/०९/२०२५ रोजी पुंडलिक बापू सुभेदार (वय वर्षे ५६, रा. कोकरे, ता. चंदगड, जि. कोल्हापूर) हे रामेवाडी या स्थानिक नावे ओळखल्या जाणा-या शेताकडे सायंकाळी ४ ते ४.३० वाजताचे दरम्यान शेतात काम करणाऱ्या शेतमजुरांना चहा देण्यासाठी गेले होते. यावेळी कोकरे येथील श्रीम. सरस्वती सिताराम सुतार यांचे गट नं. २७ मध्ये ऊसातून अचानक एका रानगव्याने येऊन त्यांचेवर हल्ला करत त्यांच्या डाव्या कुशीत शिंग घुसवून खोलवर जखम केले. पुंडलिक यांना जखमी अवस्थेत त्यांच्या कुटुंबीयांनी ग्रामीण रुग्णालय चंदगड येथे दाखल केले. मात्र त्यांना झालेली दुखापत गंभीर स्वरुपाची असलेने त्यांचे कुटुंबीयांनी त्यांना उपजिल्हा रुग्णालय गडहिंग्लज येथे पुढील उपचारासाठी हलविले. मात्र तेथे उपचार सुरु असताना त्यांचा मृत्यु झाला. घटनेची वर्दी त्यांचा मुलगा गुरुनाथ पुंडलिक सुभेदार यांनी वनविभागाकडे दिली. 

पुंडलिक बापू सुभेदार

       त्यानुसार वनविभागाचे परिक्षेत्र वन अधिकारी, चंदगड तुषार गायकवाड, वनपाल कृष्णा डेळेकर, चंद्रकांत पावसकर (वनपाल कानुर खुर्द) आदी कर्मचारी यांनी घटनास्थळी भेट देऊन घटनास्थळाची पाहणी करुन पंचनामा नोंद केला. त्यानंतर उपजिल्हा रुग्णालय गडहिंग्लज येथे जाऊन मृत व्यक्तीची पाहणी करुन कुटुंबियांची सात्वंनपर भेट घेतली. या प्रकरणी दिनांक १५/०९/२०२५ रोजी उपवनसंरक्षक वनविभाग कोल्हापूर धैर्यशील पाटील यांनी मृत व्यक्तीच्या वारसाला रक्कम रु. २५ लाख मंजूर केले आहेत. त्यानुसार सहा. वनसंरक्षक कोल्हापूर विलास काळे यांनी मौजे कोकरे येथे जाऊन कुटुंबियांची भेट घेऊन आर्थिक सहाय्य रक्कम रु. २५ लाख मंजूर केलेचे सांगून तातडीची मदत म्हणून मृत व्यक्तीची पत्नी श्रीम. अनिता पुंडलिक सुभेदार यांचे नावे रक्कम रु. ५ लाख रकमेचा धनादेश सुपूर्त केला. 

    चंदगड तालुक्यातील सर्व शेतकरी बांधवांना आवाहन करण्यात येते की, वन्यप्राणी दिसताच वन विभागाच्या कार्यालयास तात्काळ कळवावे तसेच शेतकाम करत असताना सतर्क व सुरक्षित रहावे असे आवाहन वनविभागाच्या वतीने करण्यात आले आहे.