नेसरी येथे एन.डी.आर.एफ.कडून विद्यार्थ्यांना आपत्ती व्यवस्थापनाचे धडे व प्रात्यक्षिक

 

नेसरी /सी एल वृत्तसेवा

     आपत्ती कधी आणि कोणत्या स्वरूपात येईल, याचा नेम नसतो; मात्र संकटाची चाहूल लागण्यापूर्वीच सज्जतेची कास धरल्यास संभाव्य जीवितहानी मोठ्या प्रमाणात टाळता येते. योग्य नियोजन, पूर्वतयारी आणि संकटसमयी प्रसंगावधानाने केलेली कृती हीच आपत्ती व्यवस्थापनाची खरी ताकद असल्याने विद्यार्थ्यांना या विषयाचे प्रत्यक्ष प्रशिक्षण देणे ही काळाची गरज बनली आहे. याच उद्देशाने येथील एस. एस. हायस्कूल व छत्रपती शिवाजी ज्युनिअर कॉलेज नेसरी (ता. गडहिंग्लज) येथे विद्यार्थ्यांसाठी आपत्ती व्यवस्थापनाचे विशेष प्रशिक्षण आयोजित करण्यात आले.

    दि. १ सप्टेंबर २०२६ रोजी एस. एस. हायस्कूलच्या प्रांगणात झालेल्या या कार्यक्रमात एनडीआरएफच्या पुणे विभागातील टीम क्रमांक ५-ई च्या जवानांनी विविध आपत्तीजन्य परिस्थितींतील बचावकार्याची प्रभावी प्रात्यक्षिके सादर करून विद्यार्थ्यांना मार्गदर्शन केले.

    पूरस्थितीच्या संकटात बचावकार्य कसे करावे, सुरक्षित स्थळी कसे पोहोचावे आणि उपलब्ध साधनसामग्रीचा सुयोग्य वापर करून संकटग्रस्तांच्या मदतीसाठी कसे धावून जावे, याची प्रात्यक्षिकांद्वारे माहिती देण्यात आली. भूकंपाच्या आकस्मिक धक्क्यांना सामोरे जाताना घाबरून न जाता प्रसंगावधान राखून स्वतःचे संरक्षण कसे करावे आणि सुरक्षिततेचा मार्ग कसा स्वीकारावा, हेही जवानांनी प्रत्यक्ष दाखवून दिले.

    आगीच्या प्रसंगी गोंधळून न जाता सुरक्षिततेला प्राधान्य देणे, इतरांना सतर्क करणे आणि तातडीने संबंधित आपत्कालीन यंत्रणेशी संपर्क साधणे, याबाबत विद्यार्थ्यांना मार्गदर्शन करण्यात आले.

    सर्पदंशाच्या प्रसंगी अंधश्रद्धेच्या आहारी न जाता विवेकाने आणि तत्परतेने वैद्यकीय मदत घेणे किती आवश्यक आहे, हे विद्यार्थ्यांना समजावून सांगण्यात आले. तसेच प्रथमोपचाराच्या विविध पद्धतींची प्रात्यक्षिके सादर करून जखमी व्यक्तीला मदत करताना घ्यावयाची आवश्यक काळजी स्पष्ट करण्यात आली.

    हृदयविकाराच्या झटक्यासारख्या आकस्मिक परिस्थितीत प्रत्येक क्षण महत्त्वाचा असल्याने रुग्णाला तातडीने वैद्यकीय मदत मिळवून देण्याची गरज जवानांनी अधोरेखित केली.

    एनडीआरएफच्या जवानांनी सादर केलेल्या या प्रभावी प्रात्यक्षिकांमुळे विद्यार्थ्यांना आपत्ती व्यवस्थापनाचे केवळ पुस्तकी ज्ञान न मिळता संकटसमयी योग्य निर्णय घेऊन प्रत्यक्ष कृती करण्याचा आत्मविश्वास मिळाला. सज्जता, सतर्कता आणि समयसूचकता हीच आपत्तीवर मात करण्याची त्रिसूत्री असल्याचा संदेश या प्रशिक्षणातून विद्यार्थ्यांपर्यंत पोहोचला.

    कार्यक्रमासाठी संस्थेचे अध्यक्ष ॲड. हेमंत कोलेकर यांचे मार्गदर्शन लाभले. यावेळी प्राचार्य एस. एच. पाटील, उपप्राचार्य एस. एन. पाटील, उपमुख्याध्यापक एम. ए. कांबळे, पर्यवेक्षक एस. पी. सुतार तसेच हायस्कूल व ज्युनिअर कॉलेजचे शिक्षक आणि विद्यार्थी उपस्थित होते.