एक राखी सैनिकासाठी, सीमेवरील भावांसाठी...! मांडेंदुर्ग केंद्र शाळेचा उपक्रम

 

कालकुंद्री : सी एल वृत्तसेवा

      ज्यांच्यामुळे आपण सुरक्षित आहोत, अशा भारत मातेच्या रक्षणासाठी देशाच्या सीमेवर अहोरात्र तैनात असलेल्या जवानांसाठी केंद्रशाळा कुमार विद्यामंदिर मांडेंदुर्ग, ता चंदगड शाळेच्या वतीने राख्या पाठवण्यात आल्या. सलग दुसऱ्या वर्षी विद्यार्थिनींनी स्वकल्पकतेने या राख्या बनवल्या होत्या.

मांडेदुर्ग शाळेतील विद्यार्थिनींनी बनवलेल्या राख्या आर्मी केंद्र बेळगाव येथे पाठवण्यात आल्या. यावेळी उपस्थित मुख्याध्यापक, शिक्षक व विद्यार्थिनी.

          बहीण भावाचे अतूट नाते असलेल्या रक्षाबंधनाच्या सणाला, राख्यांना अनन्यसाधारण महत्त्व आहे. देशसेवेसाठी तैनात असलेल्या सैनिकांना आपल्या बहिणीकडून राख्या बांधून घेणे शक्य होत नाही. डोळ्यात तेल घालून आपले रक्षण करणाऱ्या सीमेवरील भावांचा उत्साह वाढावा. त्यांना बहिणीच्या  मायेचा ओलावा मिळावा, यासाठी मांडेदुर्ग शाळेतील चिमुकल्यांच्या स्वनिर्मित 125 राख्या यंदा मराठा लाईट इन्फंट्री बेळगाव येथील सैनिक कॅम्प मधील जवानांना पाठवण्यात आल्या. गत वर्षी याच उपक्रमांतर्गत आर्मी कॅम्प दिल्ली येथे राख्या पाठवण्यात आल्या होत्या. 

          या उपक्रमासाठी विद्यार्थ्यांना मुख्याध्यापक एम.डी नाईक, अध्यापिका कविता पाटील, सुभद्रा पाटील, सुधा पाटील, राम कांबळे, विश्वनाथ पाटील, भरमू कांबळे यांचे मार्गदर्शन व शाळा व्यवस्थापन कमिटीचे सहकार्य लाभले.