निट्टूर गावचे माजी सरपंच व माजी कुस्तीगीर मारुती पाटील यांचे निधन

मारुती गावडू पाटील

कालकुंद्री : सी एल वृत्तसेवा

    निट्टूर (ता. चंदगड) येथील ज्येष्ठ नागरिक, गावचे माजी सरपंच, जय शिवराय विकास सेवा सोसायटी, भैरवनाथ दूध संस्था, ताम्रपर्णी पत संस्था कोवाड चे माजी संचालक तसेच जुन्या काळातील सुप्रसिद्ध पैलवान व कुस्ती पंच मारुती गावडू पाटील, वय ८० यांचे दि. ११/०८/२०२५ रोजी अल्पशा आजाराने मुंबई येथे निधन झाले. माजी आमदार व्ही. के. चव्हाण- पाटील यांचे खंदे समर्थक व राजकीय पिंड असलेल्या मारुती पाटील यांनी अनेक संस्थांच्या माध्यमातून गावचा विकास साधण्याचा अखेरच्या श्वासापर्यंत प्रामाणिक प्रयत्न केला.   बलदंड शरीरयष्टी असलेले मारुती पाटील जुन्या काळातील एक सुप्रसिद्ध मल्ल व कुस्ती पंच म्हणून परिचित होते. निट्टूर येथे गुढीपाडवा निमित्त दरवर्षी होणाऱ्या कुस्ती  मैदानाच्या यशस्वीतेसाठी त्यांचे गेली अनेक वर्षे मोठे योगदान होते. डॉक्टर राजू पाटील व रॉयल क्लासेस चे मालक युवराज पाटील यांचे ते वडील होत. त्यांच्या पश्चात पत्नी, विवाहित चिरंजीव, मुलगी, सुना नातवंडे असा परिवार आहे. त्यांच्यावर निटूर येथे मंगळवारी सकाळी अंत्यसंस्कार करण्यात येणार आहेत.