मुख्यमंत्री देवेंद्रजी फडणवीस रविवारी चंदगडमध्ये, आमदार शिवाजी पाटील यांचे विराट सभेचे नियोजन, चंदगडसाठी काय घोषणा करणार याकडे सर्वांचे लक्ष

नगरपंचायत निवडणुक प्रचार आणि आगामी जिल्हा परिषद, पंचायत समिती निवडणुकीच्या अनुषंगाने कार्यकर्त्यांना संबोधित करणार

चंदगड / सी. एल. वृत्तसेवा

        महाराष्ट्र राज्याचे लोकप्रिय मुख्यमंत्री मुख्यमंत्री देवेंद्रजी फडणवीस उद्या रविवार दि. ३० नोव्हेंबर २०२५ रोजी  चंदगड विधानसभा मतदारसंघाच्या दौऱ्यावर येणार आहेत.  चंदगड नगरपंचायत, गडहिंग्लज नगरपरिषद व आजरा नगरपंचायत निवडणुकीच्या अनुषंगाने त्यांची रविवारी दुपारी १२:३० वा. चंदगड येथील हिंडाल्को कंपनीच्या मैदानावर भव्य प्रचार सभा होणार आहे. तसेच यावेळी मुख्यमंत्री आगामी जिल्हा परिषद, पंचायत समिती आणि स्थानिक स्वराज्य संस्थांच्या निवडणुकींच्या अनुषंगाने भाजपा कार्यकर्त्यांना मार्गदर्शनही करणार आहेत. या प्रचार सभेसाठी चंद्रकांतदादा पाटील, खासदार धनंजय महाडिक, आमदार अमल महाडिक, आम. राहुल आवाडे, माजी राज्यमंत्री भरमुआण्णा पाटील, सुरेश हाळवणकर, प्रकाश आवाडे, संजयबाबा घाटगे, महेश जाधव, अप्पी पाटील, स्वाती कोरी, नाथाजी पाटील यांच्यासह जिल्ह्यातील मान्यवर भाजपा पदाधिकारी उपस्थित राहणार आहेत. अशी माहिती चंदगड विधानसभा मतदारसंघाचे आमदार शिवाजी पाटील यांनी पत्रकारांशी बोलताना दिली. 

         यावेळी पुढे बोलताना आमदार शिवाजी पाटील म्हणाले, २ वर्षांपूर्वी मुख्यमंत्री देवेंद्रजी फडणवीस यांनी निट्टुर येथे चंदगड वासीयांना शब्द दिला होता कि ते चंदगडला पुन्हां येणार आणि आपला शब्द पाळत ते रविवारी चंदगडला येत आहेत. तब्बल ३० वर्षांनंतर महाराष्ट्र राज्याच्या मुख्यमंत्री पदावर असणारे नेतृत्वाचे चंदगडच्या मातीत पाय ठेवणार आहे. त्यांचा स्वागतासाठी चंदगड, गडहिंग्लज व आजरा तालुक्यातील सर्व भाजपा कार्यकर्ते सज्ज झाले आहेत. मुख्यमंत्री महोदयांच्या आगमनाने चंदगड विधानसभा मतदारसंघातील भाजपा कार्यकर्त्यांना उर्जा मिळेल आणि चंदगड नगरपंचायत, गडहिंग्लज नगरपरिषद व आजरा नगरपंचायत निवडणुकीत भारतीय जनता पक्षाचाच विजय होईल असा विश्वास त्यांनी यावेळी व्यक्त केला. 

         यावेळी त्यांनी या भव्य प्रचार सभेसाठी चंदगड, गडहिंग्लज व आजरा तालुक्यातील भारतीय जनता पक्षाचे सर्व आजी / माजी पदाधिकारी, सर्व सेलचे प्रमुख, आजी / माजी जिल्हा परिषद व पंचायत समिती सदस्य, सर्व सरपंच उपसरपंच, ग्रामपंचायत सदस्य, बुथ प्रमुख, शक्ती प्रमुख, सुपर वॉरीअर्स आणि भाजपा कार्यकर्त्यांनी या सभेसाठी मोठ्या संख्येने उपस्थित रहावे आणि आपल्या लाडक्या देवाभाऊंना आशिर्वाद द्यावा अशी विनंती केली.