आमदार व शेतकरी संघटनेतील इर्षेने शेतकऱ्यांचा फायदा..! चंदगड मधील साखर कारखान्यांचा ऊस दर प्रति टन ३४०० वरुन ३५१० रुपये

 

कालकुंद्री : सी. एल. वृत्तसेवा

    पाच-सहा दिवसांपूर्वी चंदगडचे आमदार शिवाजी पाटील यांनी तालुक्यातील ओलम (राजगोळी खुर्द), अथर्व- दौलत (हलकर्णी) व इकोकेन शुगर (माळुंगे) कारखानदारांची संयुक्त बैठक घेऊन यंदाच्या गळीत हंगामात उसाला प्रति टन ३४०० दर निश्चित केला होता. तथापि त्यानंतर लागलीच दुसऱ्या दिवशी पासून स्वाभिमानी शेतकरी संघटनेचे नेते माजी खासदार राजू शेट्टी, कर्नाटक राज्याचे माजी मंत्री शशिकांत नाईक, काडसिद्धेश्वर स्वामी, स्वाभिमानीचे राज्य सचिव राजेंद्र गड्ड्यानावर, जिल्हाध्यक्ष राजेंद्र पोवार, प्रा. दीपक पाटील, चंदगड तालुका अध्यक्ष जगन्नाथ हुलजी यांनी राजगोळी खुर्द येथील हेमरस ओलम कारखाना आवारात तळ ठोकून किमान ३६०० दर घेतल्याशिवाय एक ही वाहन कारखान्यात शिरू देणार नाही अशी भूमिका घेतली. त्याला कर्नाटकातील शेतकऱ्यांची बलाढ्य रयत संघटनेचे मोठे पाठबळ लाभले. दोन्ही राज्यातील शेतकरी संघटना व त्यांना शेतकऱ्यांचा मिळत असलेला पाठिंबा पाहून ओलम चे प्रशासन प्रशासनाला घालीन लोटांगण करावे लागले. 

        शेतकरी संघटनांच्या आंदोलनाला वाढत असलेला शेतकऱ्यांचा पाठिंबा पाहून जास्त दिवस कारखाना बंद ठेवणे कुठल्याच कारखान्याला परवडणारे नव्हते. त्यामुळे आमदारांसमोर जाहीर केलेल्या ३४०० वरून पहिली उचल ३५०० रुपये करावी लागली. अर्थात हा दर सर्वच उपविभागातील सर्वच कारखान्यांना बंधनकारक ठरला. 

          आमदार शिवाजीराव पाटील यांच्या मध्यस्थीनंतर शेतकरी संघटनेने केलेल्या आमदारांवरील कुरघोडीमुळे तालुक्यातील शेतकऱ्यांमध्ये वेगळा संदेश जाऊ लागला. अर्थात त्याची दखल आमदार शिवाजी पाटील यांना घ्यावी लागली. त्यांच्या आदेशाने भाजप पक्षाच्या शिष्टमंडळाने बोलावलेल्या बैठकीत शुक्रवार दि. २८/१२/१/२०२५ रोजी चंदगड तालुक्यातील ओलम शुगर्स, इको केन शुगर्स, अथर्व - दौलत शुगर्स या तिन्ही कारखान्यांच्या दराची जबाबदारी स्वतः घेऊन ३५१० रुपये प्रति टन दर पत्रकारांसमोर जाहीर केला. याचा फायदा सहाजिकच चंदगड आजरा गडहिंग्लज तालुक्यातील शेतकऱ्यांना मिळणार आहे. 

    सुरुवातीला ३४०० मिळणारा दर ३५०० झाल्यामुळे उपविभागातील शेतकऱ्यांना अंदाजे २० कोटी रुपयांचा फायदा शेतकरी संघटनेने मिळवून दिला होता. आता पुन्हा आमदारांच्या माध्यमातून प्रति टन १० रुपये वाढल्यामुळे शेतकऱ्यांचा आणखी २ कोटी रुपये फायदा झाला. या परस्पर कुरघोडीमुळे चंदगड मधील सर्वसामान्य ऊस उत्पादक शेतकरी सुखावला नसला तरच नवल.

  यावेळी माजी सभापती शांताराम पाटील, संजय गांधी निराधार योजनेचे अध्यक्ष लक्ष्मण गावडे, रवी बांदिवडेकर, डॉ. परशराम गावडे, शंकर मनवाडकर, माजी जि. प. सदस्य सचिन बल्लाळ व सुरेश सातवणेकर आदींची उपस्थिती होती.