चलवेनहट्टी जवळ दुचाकी- बोलेरो पिकप अपघातात किटवाडचा तरुण जागीच ठार

कुदनूर : सी एल वृत्तसेवा 

  बेळगावहून कुरियाळकडे जाणाऱ्या भरगाव बोलेरो पिकअप व मोटरसायकल यांच्यात धडक होऊन झालेल्या अपघातात दुचाकी वरील किटवाड (ता. चंदगड) येथील एका तरुणाचा मृत्यू झाला.

   ही घटना काल शनिवारी दि. २९/११/२०२५ कर्नाटक हद्दीतील चलवेनहट्टी जवळ दुपारी घडली. काकती पोलीस स्टेशनला या अपघाताची नोंद झाली आहे. चलवेनहट्टी (ता. बेळगाव) या मूळ गावचा रहिवासी पण स्थायिक किटवाड गावी असून शिवाजी राजाई असे दुर्देवी तरुणाचे नाव आहे. आपले शिक्षण पूर्ण करून बेळगाव येथील एका हॉस्पिटलमध्ये एक्स-रे डिपार्टमेंटला तो एक वर्षापासून जात होता. निमितपणे याच रस्त्याने ये जा करत असे. काल कामासाठी घरातून निघाल्यानंतर चलवेनहट्टी गावाच्या पुढे बेळगावहून येणाऱ्या भरघाव बोलेरो पिकअप ने मोटर सायकल ला धडक दिली. जवळपास पाच फुटापर्यंत हा तरुण धडकेमुळे उडून पडला व गंभीर जखमी झाला. 

      या घटनास्थळी त्यावेळी कोणीच लक्ष दिल नाही. येणारे जाणारे असेच हे जात होते अर्धा तास जखमी अवस्थेत तो तसाच पडून होता. या अपघाताची दृश्ये व्हाट्सअप च्या माध्यमातून कोणीतरी व्हायरल केल्यानंतर किटवडगावच्या तरुणांनी अपघात स्थळी धाव घेतली. जखमीला तात्काळ ॲम्बुलन्स ने खाजगी रुग्णालयात दाखल केले. तथापि उपचारापूर्वीच दुपारी ४.३० च्या सुमारास शिवाजीचे निधन झाल्याचे डॉक्टरांनी घोषित केले.

  काकती पोलीस ठाण्या मार्फत पंचनामा करण्यात आला. घटनेचा अधिक तपास पोलीस करत आहेत. 

  शिवाजी राजाई यांच्या पश्चात आई, तीन बहिणी असून दोन बहिणी विवाहित आहेत. मुळगाव चलवेनहट्टी येथे नवीन घर बांधले असून थोड्याच दिवसात त्याचे वास्तुशांती होणार होती. या दुःखद घटनेमुळे दोन्ही गावे मित्र परिवारावर शोककळा पसरली आहे.