चुलीवरच्या भाकरीतून जीवन शिक्षणाचा सुगंध, दि न्यू इंग्लिश स्कूल चंदगड येथे आनंददायी शनिवार उपक्रमांतर्गत अनुभवातून संस्कारांचा जागर

चुलीवर भाकरी बनविताना विद्यार्थ्यीनी

चंदगड : सी. एल. वृत्तसेवा दि. ४-१-२०२६

      चुलीचा धूर, भाकरीचा दरवळ, ठेच्याची झणझणीत चव आणि पिठल्याची आपुलकी… अशा जिव्हाळ्याच्या वातावरणात आनंददायी शनिवार उपक्रमांतर्गत दि न्यू इंग्लिश स्कूल, चंदगड येथे “चुलीवरच्या भाकरी” हा अनुभवसमृद्ध व संस्कारक्षम उपक्रम मोठ्या उत्साहात पार पडला.

      या उपक्रमात विद्यार्थ्यांनी स्वतःच्या हातांनी चुल पेटवली, कणिक मळली, भाकरी थापल्या, ठेचा कुटला आणि पिठलं शिजवलं. हा उपक्रम केवळ स्वयंपाकापुरता मर्यादित न राहता, तो विद्यार्थ्यांसाठी जीवन जगण्याचा प्रत्यक्ष धडा ठरला.

    अनुभवातून शिकलेले जीवनधडे धुराचा त्रास, उष्णतेची झळ, भाकरी उलटवताना लागणारी एकाग्रता या साऱ्यांतून विद्यार्थ्यांना कष्टाचे महत्त्व, संयम आणि जबाबदारीची खरी जाणीव झाली. पाठ्यपुस्तकातील ज्ञानापलीकडे जाऊन कामातून ज्ञान मिळवण्याचा हा अनुभव विद्यार्थ्यांसाठी अविस्मरणीय ठरला.

        शिक्षक–विद्यार्थी नात्याची गोड अनुभूती विद्यार्थ्यांनी प्रेमाने बनवलेली भाकरी, ठेचा आणि पिठलं शिक्षकांनी उभं राहून आस्वाद घेतला. हा क्षण केवळ भोजनाचा नव्हता, तर माया, कृतज्ञता आणि नात्यांचा उत्सव होता. शिक्षकांच्या चेहऱ्यावर उमटलेला आनंद व अभिमान विद्यार्थ्यांसाठी प्रेरणादायी ठरला.

        उद्देश व मार्गदर्शन प्राचार्य आर. पी. पाटील यांच्या मार्गदर्शनाखाली उपक्रमाचे सुयोग्य नियोजन करण्यात आले. “आपला विद्यार्थी प्रत्येक क्षेत्रात स्वावलंबी झाला पाहिजे” या विचारातून शिक्षकांनी दैनंदिन जीवनातील कामांचे प्रात्यक्षिक दिले. “कर्म हेच आपले देव” हा मूल्यपाठ विद्यार्थ्यांच्या मनात खोलवर रुजवण्यात आला.

        दि न्यू इंग्लिश स्कूल, चंदगड ही केवळ शिक्षण देणारी शाळा नसून जीवन घडवणारी शाळा आहे. चुलीवरच्या भाकरीतून विद्यार्थ्यांनी भाकरी बनवायला शिकलं, पण त्याहून महत्त्वाचं कष्ट, स्वावलंबन, संस्कार आणि माणुसकी शिकली. हा अनुभव त्यांच्या आयुष्यभर दरवळत राहणारा ठरला.

    उपक्रमाचा प्रभाव या उपक्रमामुळे विद्यार्थ्यांचा आत्मविश्वास वाढला, श्रमाचे महत्त्व उमगले, स्वावलंबनाची जाणीव निर्माण झाली आणि शिक्षक–विद्यार्थी नाते अधिक दृढ झाले. पालक, ग्रामस्थ व शिक्षणप्रेमींनी या उपक्रमाचे मनापासून कौतुक केले.

    उपप्राचार्य व्ही. एन. कांबळे, संजय साबळे, टी. व्ही. खंडाळे, जी. जी. पाटील, शरद हदगल, ओंकार पाटील, आकाश चव्हाण, एस. पी. कोळी, विद्या डोंगरे, वैशाली पाटील, भाग्यश्री पाटील यांनी या उपक्रमासाठी परिश्रम घेतले.